"Muart Rosse" (3di3). Brusâ dut

Photo Credit: StonerXunah via Compfight cc

Muart Rosse
3. Brusâ dut
 


Cumò al sintive dome il lent movisi da lis peraulis, il lôr indolent bulicjâ dentri la sô ment: «Lis flamis dai trepîts si distudarin. E il scûr, la ruvine, la Muart Rosse a fissarin su dut la lôr paronance cence confins.»
E cun chest, il muart al veve ancje finît di pensâ.



“CD-30 a Centrâl, CD-30 a Centrâl. Rispuindêt!” al zigave Siro De Luca tal microfon spietant une rispueste.
I doi agjents a jerin tornâts a la machine par conseâsi cun Martinis su ce fâ.
“Ti scolti, Siro” i rispuindè la vôs sustose di Martinis.
“Nus covente un miedi e a la svelte.”
“Un miedi? Alore e je vere, o crodevi che chei mats da la dimension Farenheit 451 a vessin esagjerât…”
“Nuie di esagjerât, Martinis: situazion suspiete e possibilitât di infezion in cors.”
“Capît. Isolìn il sisteme e podopo o pues mandâus il miedi di turni chì in Centrâl.”
“No, Martinis, no tu âs capît, al covente fâ a la svelte. E nus covente un miedi usât a vê ce fâ cun robis dal gjenar.”
“De Luca, viôt di dâti une calmade.”
Little i gjavà il trasmetidôr da lis mans di De Luca: “Martinis, cun rispiet, chì la situazion e je grivie. La richieste di Siro e je plui che motivade.”
“Poben… e indulà volêso lâ a cjatâlu un miedi come che disês voaltris, alore?” i domandâ Martinis.
“O vin pensât al sisteme Cjan dai Baskerville. Chel là nus somee la persone juste.”
Dopo di chê discussion cun Martinis lâ e tornâ dal sisteme Cjan dai Baskerville al jere stât la robe plui semplice di une zornade che ancjemò no dave segnâi di volê finî.
Di cuant che a jerin ripartîts di denant dal 221B di Baker Street, il dotôr John H. Watson nol veve molât un moment di domandâ informazions a rivuart da la situazion che a varessin cjatât a destinazion.
“Di tantis aventuris cun chel osteât di Holmes, cheste mi mancjave pardabon!” al diseve sentât tal senton daûr. “Ma, sintît, sêso sigûrs che si pues lâ ator cussì? No varessino di vê un permès speciâl, o alc dal gjenar?”
“No son fastidis, dotôr” i rispuindè De Luca. “O vin il consens de Centrâl dal Control Dimensionâl e po o tornarin a puartâlu indaûr tal moment che lui al preferis: al sarà come che nol ves pierdût nancje un second.”
“Ben, ben,” al disè incoragjît Watson, “mi displâs dome che chel diaul di Holmes al sedi in un dai siei moments di depression riflessive, sierât in cjamare a sunâ il violin… O vuei dî che al sarès stât gustôs viodilu operâ intune altre dimension. Plui lu cognos e plui mi somee saltât fûr di un altri mont.”
Lis ruedis da la machine si poiarin un altre volte su la jerbe ch’e circondave la piçule borgade di cjasutis dai resistents cuintri il sisteme che ta la dimension Farenheit 451 al voleve scancelâ i libris, pleant la popolazion a une vite fate dome di imagjinis eletronichis cence ricuarts.
Little, De Luca e il dotôr Watson a dismontarin intun moment da la machine. Intun pâr di pas il londinês al veve bielzà i scarpins plens di polvar e il soreli si jere fat simpri plui sflandorôs. Cumò al someave brusâ il Timp.
“Il mont al cor convulsîf intun cercli, al zire sul so as e il Timp al è dut ocupât a consumâ, brusant, i agns e la int, in ogni mût, cence bisugne di jutori” si cjatà a pensâ Siro De Luca, intant che cui siei compagns di viaç si dirizeve viers de cjasute dal malât: “Ven a stâi che, s’e je int ch’e bruse lis robis, come i milizians dal fûc, e ancje il soreli al bruse il Timp, ven a stâi che chì dut al bruse.”
Ma i resonaments di De Luca a forin savoltâts da lis pocjis peraulis che L’Isule dal Tesaur al disè vignint viers di lôr.
“Al è muart.”
Watson al jere curiôs di dâ une cjalade al cadavar, ancje se no jere plui nissune possibilitât di fâ alc par lui. Al voleve viodi alc di gnûf e probabilmentri di stâ ancjemò un pôc fûr de sô consuete dimension. I doi agjents dal Control Dimensionâl lu scortarin a viodi il muart oribilmentri sfigurât, ancje se Little al vares fat vulintîr di mancul, deludût e invelegnât come ch’al jere di no jessi rivât a disberdeâ chel maledet gredei fasint biele figure cui siei superiôrs.
“Disfantament dal jessi” al fè sentence Watson, viodint ce ch’al jere restât di chel che une volte a clamavin La Mascare da la Muart Rosse. “In compagnie di Holmes o ‘nd ai viodudis robis fûr dal normâl, ma cheste… No sai ce dîsi, ma se o volin tentâ une diagnosi o disares che si è malât da la sô stesse malatie. Ven a stâi: chest om nol ‘saveve’ la Muart Rosse, chest om al ‘jere’ la Muart Rosse.”
“Brute storie” al comentà laconic Little.
“Ma, dotôr, ce vûlial dîsi ch’al ‘jere’?” al cirî di lâ a font De Luca.
“Nol je une robe tant elementâr… no lu sai spiegâ ben nancje jo, agjent” al rispuindè Watson. “Forsit ch’al jere rivât a cognossisi ad implen e dal dut.”
“Ben, dotôr, o tornin a menâlu in Baker Street. Al sarà impazient di tornâ a lis sôs indagjinis” al disè Little e dopo si voltâ viers L’Isule dal Tesaur e Vincmîl leghis sot dal mâr. “Al è stât un plasè, a la prossime, sperant intune situazion plui legre.”
“Agjents, dotôr Watson, us disin graciis par ce ch’o vês fat. In dut câs, graciis” al saludà L’Isule dal Tesaur.
Ducj i oms si saludarin. Ma intant che Siro De Luca al strenzeve la man da L’Isule dal Tesaur i vignì un lamp tal cjâf e dut a un bot al capì cuâl ch’al jere il so destin.
“Cumò o restais cence un om e cence La Mascare da la Muart Rosse?” al disè.
“No sai, forsit o varin di spietâ un pôc, ma al saltarà fûr cualchidun pront a cjapâ chel puest vueit. Nô no vin premure.”
“Podaressio jessi jo, chel om? Che memorie?” al domandà De Luca.
L’Isule dal Tesaur lu cjalâ fis tai voi e i metè une man su la spale. Dut al jere scrit ta lis lôr mentis: “Sì, tu lu sarâs. Ma visiti di une robe: tu no tu sês impuartant. Tu no tu sês nuie. Dome che, un dì, il bagai che al puarte ognidun di nô ta la sô ment al podarà jessi util par cualchidun. Par chel nô o fasin ce ch’o fasin.”

Nessun commento: